تحریک انصاف نے نگران وزیر اعظم کے لیے تین نام پیش کر دیئے

نگراں وزیر اعظم کے ساتھ ساتھ پنجاب کے وزیر اعلیٰ کے لئےبھی تین نام تجویز

تحریک انصاف کے سربراہ عمران خان نے پارٹی کے سینئر رہنماؤں کے مشورے سے نگران وزیراعظم کے لئے 3 ناموں کو حتمی شکل دی ہے۔ تحریک انصاف نے جن ناموں کو فائنل کیا ہے ان میں عبدالرزاق داؤد، تصدق حسین جیلانی اور ڈاکٹر عشرت حسین شامل ہیں۔

پاکستان میں نگران حکومت کے قیام کے حوالے سے مختلف نام سامنے آنا شروع ہوگئے ہیں ۔

شاہ محمود قریشی تینوں نام قومی اسمبلی میں قائد حزب اختلاف خورشید شاہ کو پیش کریں گے۔

ان ناموں کے علاوہ جو شخصیات سامنے آرہی ہیں ان میں سابق گورنر سٹیٹ بنک ڈاکٹر شمشاد اور حبیب پاشا کا نام بھی آرہا ہے، زیادہ تر شخصیات اقتصادی شعبہ سے ہیں۔

تاہم، اب تک اپوزیشن لیڈر خورشید شاہ اور حکومت کی جانب سے کوئی نام نہیں سامنے نہیں آیا۔ لیکن، امکان ہے کہ آئندہ چند روز میں اس عمل میں تیزی آئے گی اور نگران وزیر اعظم اور صوبائی وزرائے اعلیٰ کے ناموں کا فیصلہ کرلیا جائے گا۔