insat 808x454

کیا انسٹاگرام ڈاؤن ہے، پتہ کیسے چلے گا؟

26 views

سماجی  رابطے  کی  ویب  سائٹ  انسٹاگرام  نے  اپنے  صارفین  کی  سہولت  کے  لئے  ایک  نئے  فیچر  کی  آزمائش  شروع   کی  ہے مگر  وہ  فیچر  ہے  کیا؟  جانیے

تحریر:  حرا  خالد

بزرگ  کہتے  ہیں  کہ  اپنی  غلطی  کا  اقرار  کرنا  بھی بڑا  پن  ہوتا  ہے۔  انسٹاگرام  نے  اسی بڑے  پن  کا  مظاہرہ  کرتے  ہوئے  ایک  ایسا  فیچر  متعارف  کرایا  ہے  جسکے  ذریعے  انسٹا  آئندہ  سروسز  کی  معطلی  یا  عدم  دستیابی  کی  صورت  میں  خود  اپنے  صارفین  کو  مطلع  کرے  گا۔

چند  روز  قبل  فیس  بک  اور  اسکے  ساتھ وابستہ ایپلیکیشنز  کو  بڑی  تکنیکی  خرابی  کا  سامنا  کرنا  پڑا  تھا  جسکے  باعث  دنیا  بھر  کے  کڑوروں  صارفین  متاثر  ہوئے  تھے  اور  بڑی  تعداد  میں  سوشل  میڈیا  صارفین  نے  ٹویٹر  کے  ذریعے  اپنی  پریشانی  کا  اظہار  کیا  تھا۔

صارفین  کو  آئندہ  اس  زحمت  سے  بچانے  کے  لئے  انسٹا گرام میں  ایک  نئے  فیچر  کی  آزمائش  شروع  کی  گئی  ہے جس  کے  ذریعے  انسٹاگرام  اپنے  صارفین  کو  تکنیکی  خرابی  سے  متعلق خود اطلاع  کرے  گا  اور  ساتھ  ساتھ  خرابی  دور  ہوجانے  کی  صورت  میں  صارفین  کو  سروسز  کی  بحالی  سے  متعلق بھی آگاہ کیا  جائے  گا۔

انسٹا گرام نے اس حوالے سے بتایا کہ کمپنی  ہر بار سروس کے متاثر ہونے پر آگاہ نہیں کرے گی مگر جب یہ  دیکھا  جائے  گا  کہ لوگ پریشانی کا شکار  ہو  رہے ہیں اور جواب چاہتے ہیں تو  اس  بات  کا  تعین  کیا  جائے  گا  کہ  صارفین  کو  کس  طرح  مسئلے  یا  خرابی  سے  متعلق  آگاہ  کیا  جائے۔

مثال  کے  طور  پر  اگر  انسٹا  گرام  کے  اسٹوری  فیچر  میں  کوئی  تکنیکی  خرابی  ہے  جسکے  باعث  صارفین  اسٹوریز  پوسٹ  نہیں  کر  پا  رہے  یا  دیگر  اسٹوریز  دیکھ  نہیں  پا  رہے  تو صارف  کو  اس  بات  کا  نوٹیفکیشن  موصول  ہو  گا  کہ  اس  وقت  اسٹوری  فیچر  تکنیکی  خرابی  کا  شکار  ہے  اور  اس  خرابی  کو  دور  کیا  جا  رہا  ہے۔  سروس  کی  بحالی  کے  بعد  صارف  کو  اگلے  نوٹیفکیشن  کے  ذیعے  اس  بات  کی  اطلاع  دی  جائے  گی  کہ  اب  یہ  فیچر  استعمال  کیا  جا  سکتا  ہے۔

اس فیچر کو  فی  الحال آزمائشی بنیادوں  پر امریکی  صارفین  کے  لئے  پیش  کیا  گیا  ہے تاہم  جلد  ہی  اسے عالمی سطح   پر تمام  صارفین  کے  لئے  پیش  کر  دیا  جائے  گا۔

صرف  یہی  نہیں  بلکہ  کمپنی  ایک  اور  فیچر  متعارف  کروانے  کا  ارادہ  بھی  رکھتی  ہے  جس  سے  صارفین  یہ  جان  سکیں  گے  کہ  آیا  ان  کا  اکاؤنٹ  ڈس  ایبل  ہونے  والا  تو  نہیں؟اس  مقصد  کے  لئے  انسٹا  گرام کی جانب سے اکاؤنٹ اسٹیٹس نامی ٹول متعارف کرایا جا رہا ہے۔

یہ ٹول صارفین کو کمیونٹی  اسٹینڈرڈ  کے تحت رپورٹ ہونے والی پوسٹس اور مواد سے  متعلق آگاہ کرے گا، یعنی ایک طرح کا ہب ہوگا جو یہ بتائے گا کہ  آپ  کی  کس  پوسٹ  کے  ذریعے  سوشل  میڈیا  نیٹ  ورک  کے  اصولوں  کی  خلاف  ورزی  ہوئی  ہے۔

یاد  رہے  کہ  4  اکتوبر  کو فیس  بک  ،  انسٹاگرام  اور  واٹس  ایپ  کی  سروسز  ایک  بڑی  تکنیکی  خرابی  کا  شکار  ہوئیں  تھیں  جسکے  باعث  صارفین  چھ  گھنٹے  تک  ان  سوشل  ویب  سائٹس  کو  استعمال  کرنے  سے قاصر  رہے  تھے۔

یہ  بھی  پڑھیے  :  آخر یہ انٹرنیٹ سروس آئے روز ڈاؤن کیوں ہو رہی ہے؟

واضح  رہے  کہ  انسٹاگرام  کا  شمار  سماجی  رابطے  کی مقبول  ترین  سائٹس  میں  ہوتا  ہے  ۔  ایک  ملین  سے  زائد  ماہانہ  ایکٹیو  یوزرز  کے  ساتھ  انسٹا  اس  وقت  دنیا  بھر  میں  چوتھا  بڑا  سماجی  رابطے  کا  نیٹ  ورک  سمجھا  جاتا  ہے۔  فوٹو  اور  ویڈیو  شئریگ  یہ  ایپ  نوجوان  نسل  کی  پسندیدہ  ترین ایپس  میں  شمار  کی  جاتی  ہے۔ پاکستان  میں  انسٹا  گرام  استعمال  کرنے  والے  صارفین  کی  تعداد  66  لاکھ  سے  زائد  ہے  جن  میں  بڑی  تعداد  18  سے  24  سال کی عمر  کے  افراد  کی  ہے۔

Source: Instagram

مصنف کے بارے میں

راوا ڈیسک

راوا آن لائن نیوز پورٹل ہے جو تازہ ترین خبروں، تبصروں، تجزیوں سمیت پاکستان اور دنیا بھر میں روزانہ ہونے والے واقعات پر مشتمل ہے

Comments

Leave a Reply

Your email address will not be published. Required fields are marked *

Your email address will not be published. Required fields are marked *