1 8 808x454

ٹی20 ورلڈکپ ، روایتی حریفوں کے ٹاکرے کب ہوں گے؟

37 views

ٹی 20 ورلڈکپ کا  میلہ  سجنے  میں  چند  ہی  روز  رہ  گئے  ہیں۔ جیسے  جیسے ورلڈکپ  قریب  آ  رہا  ہے شائقینِ  کرکٹ  کا  جوش  و  خروش  بھی  بڑھتا  جا  رہا  ہے۔ کورونا  لاک  ڈاؤن  کے  بعد   آئی  سی  سی  کا  پہلا  بڑا  ایونٹ  ہوگا  یہی  وجہ  ہے  کہ شائقین  پرجوش  بھی  ہیں  اور  اپنی  اپنی  ٹیم  کی  سپورٹ  میں  کمر  بستہ  بھی۔

تحریر  :  خرا  خالد

ورلڈکپ  میں  کرکٹ  شائقین  کو  سب  سے  زیادہ  انتظار  روایتی  حریفوں  کے  ٹاکروں  کا  ہوتا  ہے۔  کرکٹ  کے  میدان  میں  ہونے  والا  یہ  ٹاکرا   دو  ملکوں  کے  عوام  کے  لہو  کو  ایسے  گرماتا  ہے  کہ  یہ  کھیل  نہیں  بلکہ  ایک  جنگ بن  جاتی  ہے  جس  میں  جو  جیتا  وہ  ہیرو  اور  جو  ہارا  وہ  زیرو!

آئیے  جانتے  ہیں  کہ  اس  سال ٹی  ٹوئنٹی  ورلڈکپ  میں بڑے  ٹاکرے  کن  تاریخوں  میں  ہوں  گے ۔

پاکستان  بمقابلہ  انڈیا:

کرکٹ  کے  روایتی  حریفوں  کا  تذکرہ  آتے  ہی  ذہن  میں  پاکستان  اور  ہندوستان  کا  نام   گونجتا  ہے۔  جتنا تناؤ دونوں  ممالک  کی  سرحدوں  پر ہوتا  ہے اتنا  ہی تناؤ  میچ  کے  دوران  گراؤنڈ  اور اسٹیڈیم  میں  ہوتا  ہے۔  دونوں  طرف  کے  کھلاڑی  بھی  اس  پریشر  کو  محسوس  کرتے  ہیں  اور عوام  کی  بھی  اپنی  ٹیم  سے  بلند  توقعات  وابستہ  ہوتی ہیں۔

اس  ٹی 20 ورلڈکپ  میں  پاکستان  اور  ہندوستان  کا  ٹاکرا  24  اکتوبر  کو  ہوگا۔  دونوں  ٹیموں  کے  مقابلے  کے  ساتھ  ساتھ  یہ  دونوں  کپتانوں یعنی  بابر  اعظم  اور  ویرات  کوہلی کا  بھی  مقابلہ  ہو  گا۔  اب  دیکھتے  ہیں  کہ  بابر  اعظم  اپنے  کور  ڈرائیوز  سے  پاکستانی  شائقین  کے  دل  جیتتے  ہیں  یا  ویرات  کوہلی  چیز (chase) کرنے  میں  کامیاب  ہوتے  ہیں۔

ویسٹ انڈیز بمقابلہ انگلینڈ:

ویسٹ  انڈیز  کا  مقابلہ  انگلینڈ  کے  ساتھ  23  اکتوبر  کو  ہوگا۔  یہ  میچ  اسلیے  بھی  اہمیت  اختیار  کر  گیا  ہے  کہ  ویسٹ  انڈیز  اس  ورلڈکپ  کا  دفاعی  چیمپئن  ہے  اور انگلینڈ  ٹی  ٹوئنٹی  رینکنگ  کی  نمبر  ون  ٹیم ہے ۔ مزے  کی  بات  پچھلے  ٹی  ٹوئنٹی  ورلڈکپ  کے  فائنل  میں  بھی  یہ  دونوں  ٹیمیں  ہی  آمنے  سامنے  تھیں  اور  ویسٹ  انڈیز  نے  سنسنی  خیز  مقابلے  کے  بعد  انگلینڈ  کو  شکست  دی  تھی۔  اب  دیکھیے  کہ  انگلینڈ  اپنی  شکست  کا  بدلہ  لینے  میں  کامیاب  ہوتا  ہے  یا  نہیں۔

آسٹریلیا بمقابلہ جنوبی افریقہ:

تئیس  اکتوبر  کو  جہاں ایک  بڑا  مقابلہ  ویسٹ  انڈیز  اور  انگلینڈ  کے  مابین  ہوگا  وہیں  دنیائے  کرکٹ  کی  دو  مضبوط  ٹیمیں  آسٹریلیا  اور  جنوبی  افریکہ  بھی  ایک  دوسرے  کے  مقابل  آئیں  گی۔  اب  تک  ہونے  والے آئی سی سی ٹی  20  ورلڈ کپس میں یہ دونوں ٹیمیں صرف ایک مرتبہ ہی  آمنے سامنے آئی  ہیں۔  دونوں  ٹیموں  کے  پاس  ہی  مضبوط  بیٹنگ  آرڈر  اور  تجربہ  کار  باؤلرز  موجود  ہیں۔  امید  کی  جا  رہی  ہے  کہ  یہ  مقابلہ  بھی  اعصاب  شکن  ہو  گا۔

آسٹریلیا  بمقابلہ  انگلینڈ:

ٹی 20  رینکنگ  کی  نمبر  ون  ٹیم  آسٹریلیا  کا  مقابلہ  انگلینڈ  سے  30  اکتوبر  کو  ہو  گا۔  1882  میں  انگلینڈ  کی  اپنے  ہوم  گراؤنڈ  پر  آسٹریلیا  کے  ہاتھوں  شکست  کے  بعد  لکھے  جانے  والے  آرٹیکلز  نے  دونوں  ٹیموں  کو  ایسا  روایتی  حریف  بنایا  کہ  اب  دونوں  کے  مابین  میچ  کھیل  سے  بڑھ  کر  جنگ  بن  چکا  ہے۔  یہاں  بھی  جیتنے  والا  سکندر  اور  ہارنے  والا  عوام  کے  غضب  کا  شکار  ہوتا  ہے۔

بھارت بمقابلہ  نیوزی  لینڈ:

دنیائے  کرکٹ  میں  بھارت  اور  نیوزی  لینڈ  کے میچ  کو  بھی  خاصی  اہمیت  دی  جاتی  ہے ۔ اس  ٹی 20 ورلڈکپ میں  یہ  ٹیمیں  31  اکتوبر  کو  مدِ  مقابل آئیں  گی ۔  اس  بڑے  میچ  میں  دونوں جانب سے تمام فارمیٹ میں بہترین کارکردگی دکھانے والے کھلاڑی آمنے سامنے ہوں گے  لہذا  شائقین  ابھی  سے  اس  مقابلے  کے  لئے  پر  جوش  ہیں۔

روایتی  حریفوں  کے  مقابلے  کے  ساتھ  ساتھ  کچھ  اور  میچز  بھی  خصوصی  دلچسپی  کا  باعث  ثابت  ہوں  گے  جن  میں پاپوا نیو گینی اور نمیبیا  کی  ٹیموں  کے  میچ  شامل  ہیں۔  یہ  دونوں  ٹیمیں  پہلی  بار  ورلڈکپ  میں  شریک  ہو  رہی  ہیں۔ دیکھتے  ہیں  کہ  کیا  ان  میں  کوئی  ٹاپ 12  ٹیموں  میں  جگہ  بنا  پاتی  ہے  یا  نہیں۔

یہ  بھی  پڑھیے  : ٹی20 ورلڈ کپ: پاکستان قومی اسکواڈ کا اعلان ،نئے نام بھی شامل 

یاد  رہے  کہ  اب  کی  بار  ٹی  20  ورلڈ کپ کو ابتدائی طور پر بھارت میں منعقد کیا جانا تھا تاہم  کرونا  وائرس  کی  دوسری  لہر  کے  بعد  بھارت  میں  بڑھتے  ہوئے  کرونا  کیسز  کے  پیشِ  نظر اسے متحدہ عرب امارات اور عمان منتقل کردیا گیا۔  ورلڈکپ میں کل 16 ٹیمیں مدِمقابل آئیں گی۔  17  اکتوبر سے  شروع  ہونے  والے  یہ  مقابلے 14  نومبر  تک  جاری  رہیں  گے۔

source: Media reports

مصنف کے بارے میں

راوا ڈیسک

راوا آن لائن نیوز پورٹل ہے جو تازہ ترین خبروں، تبصروں، تجزیوں سمیت پاکستان اور دنیا بھر میں روزانہ ہونے والے واقعات پر مشتمل ہے

Comments

Leave a Reply

Your email address will not be published. Required fields are marked *

Your email address will not be published. Required fields are marked *